美甲知識 Q&A [ 點解我整o既gel甲甘快甩?? ]

新手心入面好多時會有個疑問「點解人做gel甲我做gel甲，點解我咁快甩架？」

****長文慎入****

久唔久都會聽到有d同學仔 / 客人問「點解我同我朋友用埋同一個牌子，佢成3個禮拜都唔甩，我就一個星期都挨唔到架？」

每次遇到呢個問題，Jackie都會諗，究竟如何回答先會簡單易明一d呢？！因為呢個問題，實在實在有太多因素影響。絕對唔係三言兩語可以講清楚的，特別係未上過gel甲理論課的朋友仔，可能會更難理解。

先撇除品牌，產品質量因素前提下
如果你遇到同樣問題，可以嘗試從以下幾方面研究一下

（一）用75%火酒消毒甲面
做甲前，請必須用75%火酒消毒指甲面，可以去除甲面上的油脂，水份（如果抹出來是髒髒的，請重複再抹乾淨)

（二）個人指甲質地
每個人的指甲硬度，厚度，都會有差異。常見的我們統稱「水甲」的指甲，天生質地特別軟，留唔到長，呢類人天生就係搽咩甲油都會比普通人唔持久… 如果做gel 甲的話，一般大約兩星期就要更換。亦可以考慮加Clear gel 令套gel甲硬一d。

雖然唔夠其他人持久，但向好方面諗，你可以經常換款哦😘😘😘

（三）生活習慣
如果需要經常濕水，做家務，接觸清潔劑，做操重野的（包括用指尖大大力敲keyboard，洗頭鍾意用指尖喪R的），指甲磨損的程度都會比較高哦！

所以，請習慣改以指腹肉肉的位置做野，做家務就帶手套，都會有改善哦～

（四）前置作業的處理
所謂的前置作業，就係做gel 甲前，有無處理乾淨甲面上的甘皮（死皮)，如果無處理好甘皮，gel 甲就會在指緣位慢慢pop起！

**Jackie 先表明立場，上過我gel 班的同學仔都知道，我係絕對唔建議亂咁剪甘皮！因為亂來的話，係會令指緣的皮皮愈來愈硬！更莫講話剪損指緣帶來的感染問題。

（稍後時間會開一個獨立篇章講一講應唔應該剪甘皮呢件事，因為真。係。好。重。要）

（五）海綿銼磨甲面
有好多人一聽見用銼磨甲面就會耍手擰頭，好驚會令指甲變薄。嗯，的而且確，Jackie 教gel 班時，見好多同學仔都好似同自己指甲有仇，出盡力咁磨（好彩上堂時係用假甲片，唔係就出事啦）

請注意！磨指甲係用「海綿銼」，磨甲時亦係 輕 輕 力，係
輕 輕 力 呀！！輕輕力銼幾下，磨的時候唔會有好多粉塵掉出來（如果有好多粉塵，就係你太大力啦！）輕輕磨幾下，甲面無光澤就ok 哦。

千祈唔好失控喪磨～

（六）操作過程
有趣的是，唔同人油同一隻色的gel ，出來的效果深淺都有差異。因為每個人油gel 的力度，攞gel 的份量都會有唔同，所以油出來的gel 甲 厚薄都會有唔同。

gel 甲過薄，係會影響持久度。但請不要誤會gel 甲愈厚會愈持久，絕 • 對 • 唔 • 會～

（um…基於唔同人對厚薄定義都唔同，Jackie 心目中一般屋企DIY gel 甲正常的厚度係 Base >顏色2-3層> clear gel (隨心）>Top gel ) 大家可以參考一下

（七）長期服用藥物
某d長期服用藥物，會在指甲面有代謝物產生的，所以都會影響做甲的持久度哦～

就咁講講都已經講左7個points😂，所以呢…. 持久度問題真係可以好復雜架❤ 所以無上過理論課的，希望你明白Jackie 有時唔係唔想答你問題，而係都唔知由邊樹講起好，哈哈～

✨美甲DIY可以好簡單，但亦都係一門好深的學問哦～Happy Sharing✨